Загрузка...
Xəbər lenti



Загрузка...
  • 2017-Cİ İLDƏ HANSI MƏMURLARI VƏZİFƏDƏ GÖRMƏK İSTƏMİRSİZ? -

    View Results

    Loading ... Loading ...

Azərbaycanda görünməmiş İMTAHAN FIRILDAĞI: düyməsində kamera keçirdi
Azərbaycanda görünməmiş İMTAHAN FIRILDAĞI: düyməsində kamera keçirdi
03 May 2017 / 17:57 / Baxış sayı: 412
Font1 Font2 Font3 Font4

Aprelin 30-da ali təhsil müəssisələrinə II və III ixtisas qrupları üzrə  keçirilən qəbul imtahanları ilə əlaqədar Dövlət İmtahan Mərkəzində Apelyasiya Komissiyası yaradılıb.

 

Dövlət İmtahan Mərkəzindən arxiv.bizimxeber.az-a verilən məlumata görə, 1-3 may tarixlərində fəaliyyət göstərən Apelyasiya Komissiyasına imtahanın məzmunu ilə əlaqədar daxil olan müraciətlərə ekspertlər tərəfindən ətraflı cavab verilib və bununla bağlı hər bir abituriyentlə akt imzalanıb. Komissiya fəaliyyət göstərdiyi tarixlərdə imtahanlarda baş vermiş müxtəlif hallarla bağlı araşdırma aparıb və müvafiq qərarlar qəbul edib.

 

İmtahanda baş verən bir sıra hallarla bağlı Komissiya abituriyent və valideynlərə müraciət edir:

 

“Bildiyiniz kimi, Dövlət İmtahan Mərkəzi tərəfindən keçirilən imtahanlarda təhlükəsizliyin təmin edilməsi, eləcə də imtahan binasına qadağan olunan vasitələrin keçirilməsinin qarşısının alınması üçün imtahan binasının girişində xüsusi buraxılış rejimi tətbiq olunur. Xüsusi Dövlət Mühafizə Xidmətinin (XDMX), Gənclər və İdman Nazirliyinin əməkdaşları tərəfindən binaya daxil olan hər bir şəxs baxışdan keçirilir. Qəbul qaydalarına əsasən, iştirakçılar tərəfindən binaya mobil telefon və digər rabitə vasitələri, kalkulyator və digər elektron cihazlar, konspekt, lüğət, cədvəl, məlumat kitabçası və digər yardımçı vasitələr gətirmək və ya onlardan istifadə etmək qadağandır. Bununla bağlı, məlumat abituriyentin yaddaş kitabçasında, həmçinin imtahana buraxılış vərəqəsində də qeyd olunur. Çox təəssüf ki, dəfələrlə xəbərdarlıq olunmasına baxmayaraq müəyyən abituriyentlər yenə də imtahan binasına telefonla daxil olmağa cəhd edirlər. Belə ki, aprelin 30-da ali təhsil müəssisələrinə II və III ixtisas qrupları üzrə keçirilən qəbul imtahanlarında da bu cür hallara rast gəlinib. Qeyd edək ki, buraxılış rejimi zamanı abituriyentlərdən ümumilikdə 130-a yaxın mobil telefon, texniki vasitələr və çoxsaylı köməkçi tədris materialları aşkar edilib və həmin abituriyentlər imtahana buraxılmayıb”.

 

Dövlət İmtahan Mərkəzi bir daha abituriyentlərə ciddi xəbərdarlıq edir. Qəbul qaydalarına zidd olaraq imtahan binasına qadağan olunmuş vasitələr keçirən abituriyentlərin imtahan nəticələri ləğv ediləcək.

 

Bundan əlavə, imtahandan bir gün əvvəl DİM və XDMX əməkdaşlarının iştirakı ilə təhlükəsizliyin təmin edilməsi məqsədilə bütün imtahan zalları, giriş-çıxış qapıları, binanın zirzəmisi, damı möhürlənməklə Daxili İşlər Nazirliyi Baş Mühafizə İdarəsinin əməkdaşlarına mühafizə üçün təhvil verilir. Aprelin 29-da imtahan keçiriləcək binalarda aparılan yoxlama zamanı müxtəlif yerlərdə əvvəlcədən gizlədilmiş mobil telefonlar aşkar edilib. Bir binada sanitar qovşağının su çənində 2 ədəd mobil telefon, digər binada isə zibil vedrəsində 1 ədəd mobil telefon gizlədilib.

 

Öncədən həyata keçirilən tədbirlər nəticəsində imtahan günü telefonları gizlətdiyi yerdən götürən abituriyentlər saxlanılıb. Mobil telefonları su çənində gizlədən  abituriyentin üzərinə baxış zamanı əynində olan jiletin düyməsinə xüsusi xırda kamera yerləşdirdiyi məlum olub.  Abituriyentin məqsədi test kitabçasını videoya çəkmək və naqilsiz qulaqcıq vasitəsilə kənardan ona deyilən cavabları cavab kartına köçürmək olub. Digər abituriyent isə mobil telefonu təhvil verməkdən imtina edib və onu yerə çırparaq sındırıb. Göründüyü kimi, DİM tərəfindən keçirilən imtahanlarda qadağan olunan vasitələrin imtahan binasına keçirilməsi və ya istifadəsinin qarşısı alınır. Növbəti imtahanlarda iştirak edəcək abituriyentlərdən xahiş edirik ki, qəbul qaydaları və hər bir imtahandan öncə onlara təqdim olunan yaddaş kitabçasındakı məlumatlarla diqqətlə tanış olsunlar və müəyyən olunmuş qaydaları pozmağa cəhd göstərməsinlər. DİM-in əsas məqsədlərindən biri şəffaf, ədalətli və hamı üçün bərabər şərtlərlə imtahan keçirərək daha bilikli abituriyentlərin müəyyən edilməsidir.

arxiv.bizimxeber.az



Şərh yazmağa icazə verilməyib..




Yuxarı Geri Ana səhifə